Press Secretary Cris Icban maga-tambong sa anibersaryo it Kapihan sa Aklan
Halin kay BOY RYAN B. ZABAL

Mabahoe nga dungog sa mga lokal nga medya ro nakataeana nga pag-bisita ag pag-abot ni Press Secretary Dr. Crispulo 'Jun' Icban, Jr. sa Marso 20, adlaw it pagselebrar it daywang dag-on nga anibersaryo it Kapihan sa Aklan.

Si Icban nga dati nga editor-in-chief it Manila Bulletin hay maga-abot sa Sabado agud maga-tambong sa Kapihan sa Aklan aga magata-o it pagpadungog sa dati nga bise gobernador it Aklan, Atty. Ronquillo 'Kel' Tolentino.

Sa nasambit nga programa nga pagahiwaton sa Mix 'n Match Restaurant, Kalibo, Aklan mga alas sies y medya it gabii, magata-o it testimonya sanday Integrated Bar of the Philippines, Inc. Aklan chapter president Atty. Ricardo Ibarreta, Jr., dating myembro it Sangguniang Panlalawigan Atty. Santiago Regalado, Atty. Allen Salas Quimpo, presidente it Northwestern Visayan Colleges ag Odon Bandiola, sekretaryo sa Sangguniang Panlalawigan.

Maga-abot man agud makipagbuylog sanday Aklan Governor Carlito Marquez, Vice Governor Gabrielle Calizo, Congressman Florencio Miraflores, Mayor Raymar Rebaldo it banwang Kalibo, Kapisanan ng mga Brodkaster ng Pilipinas (KBP) chapter chairman Augusto Tolentino ag presidente it Publishers Association of the Philippines, Inc. (PAPI) Johnny Dayang.

Ro Kapihan sa Aklan hay gin-organisar ko Marso 23, 2008 it Aklan Media Forumnga ginsuportahan man it PAPI ag Aklan Press Club. Sa daywang dag-on nga pagpanerbisyo sa banwa, nangin lugar ro sabadohan nga Kapihan sa Aklan it mga lokal nga medya, pribado nga sektor ag ro nagapamuno sa gobyerno sa pagtalakay it mga isyu lokal man o nasyonal.

Suno kay Dayang, ro pag-abot ni Press Secretary Icban, kaibahan ro mga matag-as nga opisyal it National Commission for the Culture and the Arts ag PAPI nasyonal hay mabahoe naton nga kalipay ag dungog bangud sa anda nga mabahoe nga suporta sa daywang dag-on it Kapihan sa Aklan.

Sa dayang Sabado, Marso 20, gina-imbita ro mga nangin bisita it Kapihan sa Aklan sa sueod it daywang dag-on, mga mayores ag bise mayor, konsehales sa kada banwa ag ro mga nagapamuno sa mga ahensiya it gobyerno sa pagselebrar it anibersaryo it Kapihan sa Aklan.