Bueang ag Dama
BY FRANKLIN R. ZABAL

Si Nanay ag Tatay, sandang daywa hay perming ga ilinaway
Kun may andang problema owa nakun pag kutan-a
Si Tatay ngara pagbugtaw anang alagang manok ro kahambae
Ro among idaeum it baeay hay manok ag baboy ro ga istar.
May ana pa nganing baeay baeay sa likod it baeay
Texas ag Bisaya ro ga istar!
Pero pag umabot ro bagyo igto man kami sa likod madaeagan.
Sa baskog it hangin ro baeay namon matsa maeupad ro atup nana.
Si Nanay kun owat kina obra -
Ga tilinahi it eambong, saewal sa baeay ni Nay Pecta.
Kung owa ga tahi hay sa baeay ga pama lantsa,
Pag abot ala sais, mag eaha it humay ag kon owa it bugas
Hay Franklin mag bayo ka ag pagkatapos hay umadto ka sa tindahan ni Nanay mong Deca.
Umutang ka anay, it de lata pang suea naton, Bakasa!
Pagkatapos it bayo, nag adto ako sa tindahan

Ni Tay Gario ag ni Nay Deca nga tiyo ag tiya ko man
Maski nahadlok ako at madueom sa gina agyan,
Singhan abi nanda it mga tigueang abo kunong aswang
Naga tueo ro euha umadto sa tindahan ni Nay Deca atubang it escuelahan.
Pag abot sa tindahan una gali si Tay Gario nagabantay,
Nag istambay anay ako sa madueom nga lugar
Paghalin ni Tay Gario sa sueod it tindahan
Binueosan ni Nay Deca halin kuno imaw sa kusina
Singhan ko kay Nay Deca, mayad ayad nga gabi-i
maski mahueoy-on sige lang tira
Nay Deca pautang ngani it de lata,
Sangka latang Ligo sardinas rondoyung maistan pwede anay,
Ag dugangan mo Nay Deca it sibuyas ag mantika nga pang gisa.
Lista anay kuno, bayran ni Nanay pag may kuarta.
Si Tatay pag Domingo ala singko it agahon bugtaw eon
Naka pahaum ro kape ag saging, mainit pa
Mapanaw kuno kami, paadto sa bueangan bukid it Toralba,
Temprano pa Tay, akon malat-a , basi sampaeon pa ako kun hambaean ko pa.
Daea ko ro manok Texas ag ro ay Tatay hay Bisaya ra ana.
Ag kaibahan ro pang tari isang dosena mataeom tanan sanda,
Maski maeayo ro bueangan ana git-a nga tikaron
Sa bukid pa it Torralba, maeapit ba eon?
Tatlong oras nga pinanaw kada baeay maagihan kilaea si Tatay
Agi ay Tay Marce, Ilabas anay kita, ga dali kami singhan ni Tatay
Saeamat gid nga abo, ga dali kami ga hueat eon sanda.
Pasado alas dose umabot sa bueangan, sa pula sa puti akon nga nabatian
Ga sining git sanda, lo dyes lo dyes indi ko maintindihan
Ako gusto ko lang tindang pagkaon sa sabungan
May suman nga maeagkit, ro bueang owa ako't eabot
Tatlong oras nga hinueat kay Tatay, mangan angan gumuwa imao
Nag daug kuno ro daywang manok ag may bihag pang kaibahan.
Umuli kami nga masadya at may daeang bihag ag may pagkaon pang sobra
Nakabalik kami sa Polo alas dos na it aga-aga.
Kasangag ro mga manok sa idaeom it baeay namon, naka kulong sanda, masadya siguro at umabot ro amo nanda.
O’ Franklin pa bukae it tubi, ro manok nga bihag limpyuhan mo na
Akon anay tahiun ro atong Manok may igu sa may kilid nana.
Pag ka limpyo mo matueog ka na, singhan ni Tatay pa kanta kanta pa
Ako, nag ilis it eambong at matueog na
Abo nga pangutana, sa isip ko lang baea,
Kung si Tatay nag daog ro manok nana,
Abo ra anang kwarta, bayaran baea nana ro utang kay Nay Deca,
O gamitun ro kwarta pang kapital sa dama?